STUBETE  BADEN
 
12. OKTOBER 2024 

Sali zäme

Mir, Stubete Buebe und Meitli händ eus zum Ziel gsetzt alt und jung bimene traditionelle Schwiizer Fäscht zäme zbringe und s'luschtig z'ha.. Da mir in und um Bade wohned isch es nöch gläge eusi Stubete im Herze vo Bade dure z'fühere. Mit grossem Erfolg hämmer scho, zäme mit Schwinger, Steistösser, Trachtegruppe, Jodlerchörli, Trychler und villne musikalische Gäscht chönne eusi Stubete in Bade dure füere. De Höhepunkt isch amig de Umzug zmitzt dur Bade dure, wo mer dank enere unterstützende Stadtregierig dörfed dure füere.

Euses Bruchtum liit eus am Herze. Gliich wie d'usgsehsch, gliich welli Musig susch losisch, öb langi oder churzi Haar, tättüwiert oder nöd - egal. Mir wänd eusi Traditione pfläge und die a die nöchschte Generatione wiitergeh. Mit möglichscht vill Gliichgsinnte wämmer's luschtig und gmüetlich ha. 

Wänn Du Spass a Traditione und emene Fäschtli häsch, dänn lass Dich ii uf eusi Stubete Familie. Näbscht verschiedene Aktione unter em Johr, füered mer jedes Jahr eusi (ORIGINAL) Stubete & Alpe-Chilbi in Bade dure. Will mer wäge dem Covid Chäfer kei Stubete händ chönne dure füere und mer de Kontakt zu Eui nöd händ welle iischlafe lah, hämmer euseri Stubete Aktie is Läbe grüeft. Dank Eurer Unterstützig hämmer vill Schööns bim Verteile vo de Dividände dörfe erläbe und de Schwiizer Berghilf für es Herzensprojekt chönne  en grosse Batze überreiche.

Mer stönd ii für:

• Urchig und traditionell

• Schwiizerisch und doch wältoffe

• Solidarisch und sozial

• Für jung und alt

• Fürenand und mitenand

• Nochhaltig und Umweltbewusst

• Kultur und Tradition

Mir vom OK vom Verein Stubete, sind nöd ganz 0-8-15, villicht sogar es bizzeli speziell, händ s'Herz am rächte Fläck, sind sich für nüüt z'schaad und chönd au über eus sälber lache. Mir wüssed das eusi Idee nur mit Eurer Unterstützig cha funktioniere und für das säge mer

Danke villmal und bis glii!

 

Eues Team vo de Stubete 







 per Whats App teile mit Dine Fründe